Welcome visitor you can log in or create an account

Беларускае мястэчка

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Музей беларускага мястэчка сфармаваўся вакол адзінай ацалэлай на тэрыторыі сядзібы драўлянай хаты мінулага стагоддзя. Падчас рэканструкцыі комплекса да яе далучыліся суседзі - гэткія ж старыя драўляныя зрубы - сведкі мінулых часоў, якія набылі другое нараджэнне і новае жыццё ў якасці музейных аб'ектаў.

Экспазіцыі, што размясціліся ў іх, распавядаюць наведнікам пра розныя бакі такой ўнікальнай ды непаўторнай культурнай з'явы, як жыццё беларускіх мястэчак XIX стагоддзя. У іх жылі побач, па-суседску, уплываючы адзін на аднаго, але ж не змешваючыся сацыяльна ды антрапалагічна, тры нацыі - беларуская, габрэйская і татарская. І хаця кожны з народаў цалкам захоўваў сваю нацыянальную ідэнтычнасць, культура беларускага мястэчка ўяўляла сабой унікальную мазаіку традыцый, моваў ды рамёстваў.

Наведаўшы нашую местачковую траўную аптэку, Вы здолееце пагрузіцца ў незвычайную атмасферу лéкарства мінулых эпох, якое тады яшчэ не пахла фармалінам ды спіртам, але ж выключна духмянымі беларускімі зёлкамі. Залы аптэкі-музея распавядуць ад асаблівасцях лячэння ў даўнія часы. Не змоўчаць яны і пра нашага знакамітага доктара-земляка, што сумяшчаў сучасную навуковую медыцыну са старымі традыцыямі лячэння зёлкамі і практыкаваў яшчэ зусім нядаўна ў суседніх Рубежэвічах - Станіславе Вількоцкам.

Асаблівай атмасферай адрозніваецца наш «габрэйскі домік» - рэальны дом-майстэрня-крама, што калісьці належаў Майсею Беразовічу, а зараз адноўлены ў сапраўдным зрубе ў Парку-музею інтэрактыўнай гісторыі "Сула". Наведванне рэканструяванага жылога пакою, швейнай майстэрні і невялікай прыватнай габрэйскай крамы дазволяць адчуць такую незвычайную і крыху чароўную атмасферу старабеларускай габрэйскай культуры і давецца шмат новага пра яе спадчыну.

Дзве дзеючыя майстэрні нашага мястэчка – ткацкая і шапавальная - распавядуць і прадэманструюць гасцям амаль забытыя зараз рамёствы – традыцыйнае беларускае ткацтва ды валянне з воўны. Хочаце паспрабавацб спрасці нітку, адчуць сябе ткачом паса альбо валяльшчыкам воўны, а таксама набыць нешта на памяць? Тады шчыра запрашаем у нашы местачковыя майстэрні!

А атрымаць яркія эмоцыі ды шчыра пасмяяцца нашым гасцям дазволіць наведванне музея беларускай батлейкі. Тут вы здолееце ня толькі даведацца шмат новага аб "юцюбе" мінулых стагоддзяў, але і паглядзець сапраўдны традыцыйны лялечны спектакль у нашай унікальная трохяруснай батлейцы з аўтарскімі лялькамі.

Фотагалерэя: